NACE UN NOVO EQUIPO NA NOSA FAMILIA: A.D. MIÑO “B”

Unha vez rematadas as competicións e tódalas actividades deportivas da pasada tempada 2020/2021, podemos xa anunciar oficialmente, de cara a próxima tempada, a boa nova da creación dun novo equipo no noso Club: A.D. Miño “B”.

Este é un proxecto que levamos tempo planificando e traballando para sacar adiante e por fin se vai converter en realidade na vindeira tempada 2021/2022.

Trátase dunha aposta de futuro, pensada para que os rapaces das nosas categorías inferiores se poidan ir incorporando ó fútbol modesto e lles permita seguir dando pasos cara ó primeiro equipo, que actualmente milita en Primeira Autonómica.

Os xogadores que integrarán este segundo equipo de modestos serán na súa práctica totalidade xóvenes de Miño ou da comarca e que xa saben o que é xogar coa camiseta e o escudo da A.D. MIÑO (nas súas categorías da base e en algúns casos tamén no primeiro equipo).

O adestrador será tamén unha persoa da casa: Ramiro López, que levaba as 3 últimas tempadas adestrando o noso equipo Xuvenil e da así o salto agora ó futbol modesto.

Trátase polo tanto dun equipo feito POR E PARA O POBO DE MIÑO, polo que agardamos que esto nos achegue, aínda máis se cabe, á nosa veciñanza e lles permita a estos rapaces seguir medrando no mundo do fútbol e practicando este deporte na súa etapa senior, entre amigos e no equipo do seu pobo.

Previsiblemente, á espera de que a Federación Galega de Fútbol deseñe o plan competicional definitivo da próxima tempada, este novo equipo, o A.D. Miño “B”, militará na Segunda Autonómica de Ferrolterra e, dende xa, desexámoslle toda a sorte do mundo na súa andadura, porque sabemos que o futuro destes rapaces e deste proxecto está directamente ligado ó futuro do noso Club e os seus éxitos serán tamén os desta gran familia que somos a A.D. Miño.

Queremos dende aquí AGRADECER a AXA, ÁRTABRO SEGUROS DE MIÑO, o patrocinio deste novo equipo do pobo.

AGARDÁMOVOS EN GALLAMONDE PARA ANIMAR ÓS NOSOS EQUIPOS E ASÍ SEGUIR ESTANDO #EnOndaCoMiño 🌊 ⚪🔴⚪